|
Eagarfhocal, Feasta, Deireadh Fómhair 2000
|
Feasta
na míosa seo
|
CLG & Plean na Gaeilge
Bíonn Cumann Lúthchleas Gael go mór i súilibh an phobail an taca seo bliana,
nuair a bhíonn na craobhchluichí ar siúl san iománaíocht agus sa pheil.
Thart ar bhliain ó shin bhíomar ag caint anseo ar an réabhlóid a chruthaigh
an eagraíocht sin i saol na tíre, nuair a bunaíodh í in 1884, naoi mbliana
sular bunaíodh eagraíocht réabhlóideach eile, Conradh na Gaeilge. Bheadh sé
deacair an tír seo a shamhlú inniu gan na cluichí a d¹eagraigh agus a
d¹fhorbair Cumann Lúthchleas Gael le céad bliain anuas.
Ní miste dúinn smaoineamh i gcónaí nach eagraíocht í a bhí gafa go huile
leis na cluichí céanna, dá fheabhas a d¹éirigh léi sa chúram sin. Múscailt
spiorad agus mheanma an phobail a bhí mar phríomhaidhm ag na bunaitheoirí -
a chur i gcuimhne do dhaoine go raibh cultúr agus saíocht dá gcuid féin acu,
agus gurbh fhiú agus gur chóir iad sin a chaomhnú agus a chur chun cinn. Má
bhí, agus má tá daoine ann a shíleann gur eagraíocht í seo nach bhfuil de
chúram uirthi ach cluichí a eagrú, níl an ceart acu. Tá méar i gcónaí ag an
gCumann ar chuisle an náisiúin agus seasann sé fós le fealsúnacht na
mbunaitheoirí.
Is ábhar lúcháire é mar sin go bhfuil plean nua don Ghaeilge foilsithe le
déanaí ag C.L.G., Plean Gaeilge na Mílaoise. Cuirtear i gcuimhne dúinn arís
sa réamhrá, a ghabhann leis an bplean, gur 'ceann de bhunchlocha an Chumainn
an Ghaeilge agus an cultúr a chaomhnú agus a leathnú.¹ Is gníomh
fíorthábhachtach ar son na Gaeilge é an plean seo, ag eagraíocht a bhfuil a
thionchar le brath i ngach paróiste sa tír. Ba mhór an feall é mura dtugtar
aird air agus aitheantas dó i measc an Chumainn i gcoitinne, agus i measc na
n-eagraíochtaí a bhfuil an Ghaeilge mar chúram orthu chomh maith.
Níl sé i gceist an plean a phlé go mion anseo, bíodh gurbh fhiú é sin a
dhéanamh dá mbeadh spás ann chuige. Is leor a rá gur plean cuimsitheach atá
ann, go bhfuil béim á leagan ar ghníomhaíocht phobail, agus go mbeifear ag
comhoibriú leis na heagraíochtaí eile atá ag obair ar son na teanga. Beifear
ag súil go dtabharfaidh Conradh na Gaeilge aird ar leith ar an bplean, agus
go bhféachfar chuige go mbeidh comhoibriú praiticiúil le fáil dó ó
chraobhacha an Chonartha ar fud na tíre. Is fíor go bhfuil ceangal ar leith
idir an dá eagraíocht ó bunaíodh iad araon breis agus céad bliain ó shin,
agus is minic gurb iad na daoine céanna a bhí gníomhach sa dá eagraíocht.
Dúradh ní ba luaithe gurb é Cumann Lúthchleas Gael an eagraíocht dheonach is
mó tionchair i saol poiblí na tíre seo. Ní bheadh sé feiliúnach d¹aon dream
eile a bheith ag rá leo conas a bplean a chur i gcrích. Tá céim thábhachtach
glactha acu ar son na teanga. Tá súil againn go mbeidh an t-aitheantas úd le
fáil acu, go léifear agus go bpléifear an plean, agus ansin go mbeidh an
comhoibriú praiticiúil á iarrann siad ar fáil acu.
|
| ![.]() |
![.]() |
![.]() |
|
|
< feasta ar an idirlín >
|