An Traonach

Shíleas gur chuala uair amháin é

I bhfad uaim i gcúinne móinéir,

Shiúlas ina threo le faichill

Go gcloisfinn go cinnte soiléir.

Bhí an ghealach ag maolú a solais,

Fuaire drúchta ar crochadh san aer,

Corrsciathán leathair ag sceilg

Mhíoltóga na hoíche sa spéir.

Traonach níor chualas le cianta:

Is cuimhin go baileach an t-am:

I gcillín colláiste mé spíonta

Le huaigneas do m'bhaile is clann.

Thosaíodh sé i ndoimhneacht na hoíche,

Gan sos ina rithim nó rann,

Is thugadh ualach mo smaointe

Chuig mo choill, mo sruthán, mo ghleann.

D'éistinn leis go gealadh na maidne,

É mar fhile ag insint go cruinn

Faoina thuras thar mhacairí mara

I thar thíortha go hÉirinn anall.

Mar bhard ag moladh a shinsir,

A n-eachtraí is a ngábha anallód,

Is an slad a rinneadh ar a shíolra

Nuair a sheas siad go cróga an fód.

D'éalaigh uaim an bháisteach,

Níor chualas fiú an traein,

Ní raibh i m' shaol ach oileán:

Willie Sal is a scéal.

Caithfead cuairt a thabhairt air,

Is rachaimid araon

Thar sáile i mbád a smaointe

Chuig a chroí in Inis Gé.

Back to Filíocht