Le cabhair ó Fhoras na Gaeilge

Nuair a bhí Colm Ó Foghlú ina bhuachaill óg, bhí sé ina bhall de scoil chlúiteach damhsa Uí Shé. Ina dhiaidh sin, rinne sé staidéar san Acadamh Ríoga agus sa Choláiste Ceoil, Baile Átha Cliath ar amhránaíocht agus ar uirlisí ceoil éagsúla. Ina dhiadh sin arís, bhain sé amach céim sa cheol in Ollscoil na hÉireann, Corcaigh, i gcumadóireacht cheoil agus phianó faoi stiúir an Dr. Mícheál Ó Súilleabháin.

Moladh go hard a albam aonair, Echoing, a seoladh i 1997. Tá seóanna éagsúla scríofa aige, ina measc, Gaelforce Dance, seó amharclainne a d’oscail sa Nua Shéalainn i 1997, agus a rinne turas ar fud na hAstráile, na hÁise agus Mheiriceá Thuaidh os comhair lucht féachana de 4 mhilliún duine in ionaid iomráiteacha, The Royal Albert Hall ina measc. Bhain seóanna eile ar nós Irish Thunder do Busch Gardens, clú amach freisin agus tá iomrá ar a cheolrian do The Life of Sex and Sinners TG4/Tyrone. Bhí Colm ina láithreoir ar Tóin le Gaoith TG4 agus bíonn a ghuth le cloisteáil go rialta ar chartúin TG4.

Le déanaí, bhí Colm Ó Foghlú ina stiúrthóir ar Riverdance in amharclann an Gaiety agus tá súil aige céim máistreachta sa drámaíiocht nua-aimseartha a bhaint amach go luath sa Choláiste Ollscoile, Baile Átha Cliath

An Scéal

Gníomh I

Tá muintir Chonnacht agus a gcáirde as Cúige Uladh ag cóisir i gCruachain, príomhdhún an chúige. Cuireann teach na banríona Méabh deireadh leis an spraoi. Ní túisce ann í ná tosaíonn sí ag sáraíócht lena fear céile faoin saibhreas atá ag gach duine acu. Ní róshásta atá Méabh nuair a fhaigheann sí amach go bhfuil tarbh iontach ag Ailill nach bhfuil a macasamhail aici féin. Tá a fhios aici go bhfuil a leithéid i gCúige Uladh agus socraíonn sí ar an tarbh sin, an Donn Cuailnge, a fháil. Cuireann sí teachtairí chuig Conchúr ach ní éiríonn leo an beart a dhéanamh agus níl fágtha de rogha anois ag Méabh ach dul chun cogaíochta. Ag dún Chonchúir casann Cú Chulainn agus Eimear ar a chéile agus titeann siad i ngrá. De bharr an chogaidh atá ag bagairt caithfidh Cú Chulainn dul go hAlbain le barr feabhais a chur ar a chuid scileanna laochta. Geallann sé go bpósfaidh sé Eimear ar fhilleadh dó.

Gníomh II

Le bainis na beirte a thosaíonn an dara gníomh. Le linn na bainise, cuireann Méabh fios ar dhlúthchara Chú Chulainn, Feardia, agus caithfidh sé filleadh ar Chonnachta. Éilíonn sí de go dtroidfidh sé ar a taobh sa chogadh atá ag teacht. Tugann seo ar Fheardia agaidh a thabhairt ar a chara Cú Chulainn sa chath, comhrac a bhfuil deireadh tragóideach leis.

Táin Bó Cuailnge

Tá áit ar leith ag Táin Bó Cuailnge i measc seoda liteartha na Gaeilge atá tagtha anuas chugainn ónár sinsir. Le breis is 1200 bliain tá an scéal seo á insint agus á athinsint agus tá greim láidir aige ar shamhlaíocht mhuintir na hÉireann.

Tá réimse leathan daoine tagtha faoi anáil an mhórscéil seo agus é ina spreagadh acu. Ina measc tá Pádraig Mac Piarais, W.B. Yeats agus an racghrúpa Horslips. Scéal iontach atá ann faoi ghrá agus éad, faoi uaisleacht agus crógacht, faoi shaint agus gráin. Is cuid lárnach dár n-oidhreacht é agus aithnítear freisin é mar chuid tábhachtach de litríocht na hEorpa.

Is iad saint agus gliceas Mhéabha a chuireann tús leis an gcogadh mór idir Uladh agus Connacht, cogadh a chuireann deartháir ag troid le deartháir agus a léiríonn uaisleacht agus crógacht Chú Chulain, príomhghaiscíoch Chúige Uladh agus mórlaoch na hÉireann.

Sa leagan drámatúil seo den scéal ní dhéantar díreach an seanscéal a insint arís. Ina ionad sin cuireann Colm Ó Foghlú an scéal inár láthair in aimsir an Chéad Chogaidh Dhomhanda ag baint úsáid as scannán le cúlra a chruthú agus é ag tagairt don úsáid a baineadh as scannán le bolscaireacht a dhéanamh agus daoine óga á earcú don arm le linn an Chogaidh Mhóir. Déantar saighdiúirí as buachaillí sé bliana déag d’aois agus ardaíonn siad ceisteanna faoin mbrí atá le cogadh, ceisteanna atá chomh tráthúil anois agus a bhí said nuair a cumadh an scéal seo den chéad uair breis is 1200 bliain ó shin.

Cúirt Mhéabha

Cúirt Chonchúir